Income tax concessions for senior citizens - आयकर विभागाने जेष्ठ नागरिकांना आयकरात काही सवलती दिल्या आहेत. मग त्या सवलती उत्पन्नाच्या संबंधी असोत किंवा वैद्यकिय खर्चा संबंधी असोत. आज आपण या लेखामधून अशाच काही सवलतींची थोडक्यात माहिती घेणार आहोत ज्याचा उपयोग जेष्ठ नागरिकांना आयकरात सवलत मिळवायला होईल.
मंडळी, आयकर विभागाने जेष्ठ नागरिकांसाठी वयाच्या दोन मर्यादा सांगितल्या आहेत.
- ६० ते ७९ वर्षे या वयोगटातील व्यक्तींना सिनियर सिटीझन म्हणतात.
- ८० वर्षे आणि त्यावरील वयोगटातील व्यक्तींना सुपर सिनियर सिटीझन म्हणतात.
आयकर विभागाच्या नियमानुसार ६० ते ७९ वर्षे वयोगटात मोडणाऱ्या जेष्ठ नागरिकांना त्यांच्या उत्पन्नावर ३ लाख पर्यंत करात सूट मिळते म्हणजे त्यांना त्यांच्या उत्पन्नाच्या पहिल्या ३ लाखापर्यंत कुठलाही आयकर भरावा लागत नाही
तसंच ८० वर्षे आणि त्यावरील वयोगटात मोडणाऱ्या जेष्ठ नागरिकांना त्यांच्या उत्पन्नावर ५ लाख पर्यंत आयकरात सूट मिळते म्हणजे त्यांना त्यांच्या उत्पन्नाच्या पहिल्या ५ लाखापर्यंत कुठलाही आयकर भरावा लागत नाही.
मात्र ही सवलत जुन्या कर प्रणालीनुसार म्हणजे ओल्ड टॅक्स रीजिमनुसार मिळते. आयकरासाठी नवीन कर प्रणाली अंतर्गत दोन्ही वयोगटातील करदात्यांसाठी ही मर्यादा अडीच लाख करण्यात आली आहे.
मंडळी, हा एक मूलभूत फरक सोडला तर बाकी सवलती जेष्ठ नागरिकांच्या (Income tax concessions for senior citizens) दोन्ही वयोगटांसाठी सारख्याच आहेत.
जेष्ठ नागरिकांना आयकरात मिळणाऱ्या सवलती (Income tax concessions for senior citizens)
-
पेन्शन -
जेष्ठ नागरिकांना मिळणारं पेन्शन हा त्यांच्या उत्पन्नाचा भाग समजला जातो. वयाची ६० वर्षे पूर्ण केल्यावर व्यक्ती पेन्शन मिळवण्यास पात्र ठरते. त्यामुळे आयकर नियमानुसार पेन्शनच्या उत्पन्नातून त्यांना ५०००० रु ची अतिरिक्त वजावट दिली जाते. -
बँक ठेवींवरील व्याजावर आयकर वजावट - आयकर कायद्याच्या कलम 80TTB मुळे बँका, पोस्ट ऑफिस किंवा सहकारी बँकांमधील ठेवींमधून मिळणाऱ्या व्याजावर 50,000 रु पर्यंत करलाभ मिळतो. बचत ठेवींवर मिळणारे व्याज आणि मुदत ठेवी दोन्ही या तरतुदीनुसार वजावटीसाठी पात्र आहेत.
तसेच, आयकर कायद्याच्या 194A अन्वये, ज्येष्ठ नागरिकांना बँक, पोस्ट ऑफिस किंवा सहकारी बँकेकडून मिळणाऱ्या 50,000 रु पर्यंतच्या व्याजावर कोणताही TDS कापला जात नाही. - वैद्यकीय विमा संदर्भात कर लाभ - प्राप्तिकर कायद्याच्या कलम 80D नुसार, वैद्यकीय विम्याचा प्रीमियम भरण्यासाठी ₹ 50,000 पर्यंत अतिरिक्त वजावट मिळवू शकतात. गैर-ज्येष्ठ नागरिकांच्या म्हणजे ६० वर्षांहून कमी वय असलेल्यांना ही मर्यादा 25,000 रु आहे.
- विशिष्ट रोगांच्या उपचारांवर केलेल्या खर्चावर कर कपात - आयकर कलम 80DDB नुसार व्यक्तीने विशिष्ट रोगांच्या उपचारांवर केलेल्या खर्चावर कर कपात करण्यास अनुमती देते. ज्येष्ठ नागरिकाच्या बाबतीत कमाल वजावटीची मर्यादा रु 1 लाख आहे. गैर-ज्येष्ठ नागरिकांच्या म्हणजे ६० वर्षांहून कमी वय असलेल्यांना ही मर्यादा 40,000 रु आहे.
-
अ‍ॅडव्हान्स टॅक्स भरण्यापासून दिलासा - सामान्यपणे करदात्याच्या कराची रक्कम १० हजार च्या वर जात असेल तर तो कर आपल्याला आगाऊ भरावा लागतो अन्यथा त्यावर दंड आकारला जातो. मात्र, जेष्ठ नागरिकांना यातून सूट देण्यात आली आहे. त्यांनी आगाऊ कर न भरल्यास त्यांना दंड आकारला जात नाही. मात्र योग्य वेळी तो कर त्यांना भरावा लागतो.
तसंच आपण व्यावसायिक असल्यास ही सूट मिळत नाही आणि आगाऊ कर भरावा लागतो अन्यथा दंड आकारला जाऊ शकतो. - आयकर विभागाने एक अजून विशेष सूट दिली आहे. ज्यांचं वय ७५ पेक्षा जास्त आहे तसच ज्यांचं पेन्शन आणि मुदत ठेवींच व्याज एकाच बँकेत जमा होत त्यांना आयकर रिटर्न भरावा लागत नाही. संबंधित बँकच ते काम करते.
तर मंडळी या होत्या आयकर विभागाकडून जेष्ठ नागरीकांना आयकरात मिळणाऱ्या सवलती (Income tax concessions for senior citizens). आपल्या ओळखीत जर कुणी जेष्ठ नागरिक असतील तर त्यांच्या बरोबर हा लेख नक्की शेअर त्यांना सुद्धा या गोष्टींची माहिती होईल. धन्यवाद.