MSRTC Free Travel Scheme :- नमस्कार मंडळी, आपलं एसटी महामंडळ म्हणजे महाराष्ट्र राज्य परिवहन महामंडळ (MSRTC) आपल्या प्रवाश्यांसाठी अनेक योजना घेऊन येत असतं ज्यामुळे प्रवाश्यांना कधी तिकीट दरात सवलत मिळते तर कधी एखादी यात्रा विशेष सुविधांसह करता येते. खेडोपाडी पोचलेली ही आपली एसटी ही नुसती एसटी नसून जीवनवाहिनीच आहे.
एसटीतून केलेला प्रवास अतिशय सुरक्षित मानला जातो. कारण एकतर वेगावर नियंत्रण आणि चालक-वाहक ही जोडी विश्वासार्ह असते. त्यामुळे महिलासुद्दा एसटीने अगदी रात्रीसुद्धा सुरक्षितरित्या एसटीने प्रवास करू शकतात.
मंडळी आज आपण (MSRTC Free Travel Scheme) च्या अशाच काही योजना किंवा सवलतींची माहिती घेऊया ज्याअंतर्गत एसटीच्या प्रवाशांना तिकीटदरात १००% सवलत मिळते.
आपल्या सगळ्यांना माहित आहेच कि ७५ वर्षे आणि त्यापेक्षा जास्त वय असलेल्या जेष्ठ नागरिकांना एसटी बसचा प्रवास पूर्णपणे मोफत आहे. पण त्याशिवाय अजून कुणाला एसटीचा प्रवास मोफत आहे ते आता आपण बघूया.
MSRTC मोफत प्रवास योजना पात्रता | MSRTC Free Travel Scheme Eligibility
- स्वातंत्र सैनिक आणि त्याचे एक साथीदार यांना वर्षभर एसटीने मोफत प्रवास करता येतो. या सवलतीनुसार त्यांना साधी गाडी, निमआराम बस, आराम बस, वातानुकुलित बस अशा बसनी पूर्णपणे मोफत प्रवास करता येतो.
- डॉ. बाबासाहेब आंबेडकर समाजभूषण पुरस्कार प्राप्त व्यक्ती आणि त्याचे एक साथीदार यांना वर्षभर एसटीने मोफत प्रवास करता येतो. या सवलतीनुसार त्यांना साधी गाडी, निमआराम बस, आराम बस अशा बसनी पूर्णपणे मोफत प्रवास करता येतो.
- अहिल्याबाई होळकर योजनेप्रमाणे इ. ५वी ते १२वी पर्यंत शिक्षण घेणाऱ्या ग्रामीण भागातील विद्यार्थीनींसाठी एसटी च्या प्रवासात १००% सवलत मिळते म्हणजे मोफत प्रवास करता येतो. मात्र ही सवलत फक्त साध्या गाड्यांसाठी आहे.
- शासन मान्यताप्राप्त पत्रकारांना आणि मगाशी सांगितल्याप्रमाणे ७५ वर्षे आणि त्यापेक्षा जास्त वय असलेल्या जेष्ठ नागरिकांना एसटी बसचा प्रवास पूर्णपणे मोफत आहे.
- विद्यार्थ्यांच्या जेवणाचे डबे एसटीने पोचवायचे असतील तर त्यावर १००% सवलत आहे. फक्त ही सवलत साध्या गाड्यांसाठी आहे.
- अर्जुन पुरस्कार, द्रोणाचार्य पुरस्कार, दादोजी कोंडदेव पुरस्कार आणि शिवछत्रपती पुरस्कार प्राप्त खेळाडूंना साधी, निमआराम, आराम, वातानुकुलित बस मधून मोफत प्रवास करता येतो.
- आदिवासी पुरस्कार प्राप्त व्यक्ती आणि त्यांचे एक साथीदार यांना साधी, निमआराम आणि आराम बसने वर्षभर मोफत प्रवास करता येतो.
- लोकशाहीर आण्णाभाऊ साठे पुरस्कार प्राप्त व्यक्ती आणि त्यांचे साथीदार यांना साधी, निमआराम आणि आराम बसने वर्षभर मोफत प्रवास करता येतो.
- पंढरपूर आषाढी/कार्तिकी एकादशीला शासकीय पुजेचे मान मिळांलेल्या एका वारकरी दाम्पत्यास फक्त एका वर्षासाठी साधी आणि निमआराम बसने मोफत प्रवास करता येतो.
- विद्यमान किंवा माजी विधानमंडळ सदस्य व त्यांचे एक साथीदार यांना साधी, निमआराम, आराम, वातानुकुलित, शिवशाही (आसनी व शयनयान दोन्ही) बसने वर्षभर मोफत प्रवास करता येतो.
- अपंग गुणवंत कामगार पुरस्कार प्राप्त व्यक्ति व त्यांचे साथीदार याना साधी आणि निमआराम बसने मोफत प्रवास करता येतो.
- सिकलसेल रुग्ण म्हणजे लाल पेशींसंबंधी आजार असलेल्या व्यक्ती, दुर्घर आजार जसं (HIV)रुग्ण, डायलेसिस रुग्ण, हिमोफेलिया रुग्ण यांनासुद्धा साधी आणि निमआराम बसने मोफत प्रवास करता येतो.
- राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार प्राप्त व्यक्तीना साधी, निमआराम आणि आराम बसने मोफत प्रवास करता येतो.
- शिवसेनाप्रमुख बाळासाहेब ठाकरे शहीद सन्मान योजनेअंतर्गत शहिद जवानांच्या पत्नीला साधी, निमआराम, वातानुकुलित, शिवशाही (आसनी व शयनयान) बसने आयुष्यभर मोफत प्रवास करता येणार आहे.
तर या होत्या मोफत प्रवास योजना (MSRTC Free Travel Scheme) च्या काही सवलती ज्याअंतर्गत समाजातील काही घटकांना एसटी प्रवासावर १००% सवलत मिळते. पण या पैकी काही योजनांना एक छोटी अट आहे आणि ती आहे प्रवासाच्या मर्यादेची. तसंच, यातील बहुतेक योजनांचा लाभ घेण्यासाठी काही कागदपत्र निश्चितपणे दाखवावी लागतील. त्याची संपूर्ण माहिती आपल्याला जवळच्या एसटी महामंडळाच्या आगारामध्ये नक्की मिळेल. त्यामुळे कुठल्याही योजनेचा लाभ घेण्याआधी कृपया त्याची माहिती मिळवा म्हणजे आपल्याला त्याचा लाभ चांगल्या प्रकारे घेता येईल. धन्यवाद.