आज आपण प्रधानमंत्री श्रमयोगी मानधन योजनेची (Pradhanmantri Shramyogi Mandhan Yojana) माहिती घेणार आहोत. ज्याअंतर्गत असंघटित क्षेत्रात काम करणाऱ्यांसाठी निवृत्तीनंतर पेन्शनची सोय केली आहे. या योजने अंतर्गत असंघटित क्षेत्रात काम करणाऱ्यांना तीन हजार रुपये पेन्शन दरमहा मिळू शकते.
आपण या लेखामध्ये बघणार आहोत या प्रधानमंत्री श्रमयोगी मानधन योजनेची (Pradhanmantri Shramyogi Mandhan Yojana) वैशिष्ट्ये, पात्रता, लाभार्थी, नाव नोंदणी कशी करायची आणि फायदे.
Table of Contents
प्रधानमंत्री श्रमयोगी मानधन योजना (Pradhanmantri Shramyogi Mandhan Yojana)
ही योजना भारत सरकारने असंघटित क्षेत्रात काम करणाऱ्यांसाठी सुरू केली आहे ज्यांना कुठले प्रकारचा पेन्शन मिळत नाही. यात मजूर वर्गातील कामगार, फेरीवाले, बांधकाम क्षेत्रातील कामगार, रोजंदारीवर काम करणारे मजूर, भूमिहीन शेतकरी व इतर अनेक असंघटित कामगारांचा समावेश होतो.
या योजनेत 18 ते 40 वयोगटातील अर्जदारांना वयाची साठ वर्षे पूर्ण होईपर्यंत पंचावन्न ते दोनशे रुपये दरमहा भरावे लागतात आणि जेवढी रक्कम आपण गुंतवता तेवढीच सरकार कडून ही गुंतवली जाते. अर्जदाराच्या वयाची साठ वर्षे पूर्ण झाल्यावर दरमहा तीन हजार पेन्शन मिळू शकते आणि ही रक्कम थेट बँक खात्यात जमा होते
प्रधानमंत्री श्रमयोगी मानधन योजना पात्रता (Pradhanmantri Shramyogi Mandhan Yojana Eligibility)
- ही योजना फक्त असंघटित क्षेत्रात काम करणाऱ्यांसाठी आहे
- या योजनेचा लाभ मिळविण्यासाठी आपलं वय 18 ते 40 च्या दरम्यान असावं
- आपलं मासिक उत्पन्न 15000 किंवा त्यापेक्षा कमी असावं
- आयकर भरणारे किंवा राष्ट्रीय पेन्शन योजना कर्मचारी राज्य विमा योजना आणि प्रॉव्हिडंट फंडात खात असणाऱ्या व्यक्तींना या योजनेत सहभागी होता येत नाही
तुम्हाला हेसुद्धा वाचायला आवडेल:
ई श्रम कार्ड, ई श्रम पोर्टल म्हणजे काय? त्याचे फायदे, कागदपत्रे, नावनोंदणी
प्रधानमंत्री श्रमयोगी मानधन योजना कागदपत्रे (Pradhanmantri Shramyogi Mandhan Yojana Documents)
या योजनेत सहभागी होण्यासाठी आपल्याजवळ आधार कार्ड, मोबाईल नंबर आणि बँक खाते असणे अनिवार्य आहे
प्रधानमंत्री श्रमयोगी मानधन योजना नावनोंदणी(Pradhanmantri Shramyogi Mandhan Yojana enrollment)
या योजनेत नाव नोंदणी करण्यासाठी पहिला पर्याय म्हणजे सरकारने खास तयार केलेल्या पोर्टलवर जाऊन करू शकता त्यासाठी लागणारी लिंक डिस्क्रिप्शन बॉक्स मध्ये दिलेली आहे ते आपण पाहू शकता
https://maandhan.in/auth/login
आणि दुसरा पर्याय म्हणजे जवळच्या CSC केंद्राला भेट देऊन सुद्धा नाव नोंदणी करू शकता.
प्रधानमंत्री श्रमयोगी मानधन योजना फायदे(Pradhanmantri Shramyogi Mandhan Yojana benefits)
- या योजनेत सहभागी झाल्याच्या तारखेपासून दहा वर्षांपेक्षा कमी कालावधीत लाभार्थी या योजनेतून बाहेर पडत असेल, तर त्याला त्याने भरलेल्या रकमेचा हिस्सा आणि बचत खात्याद्वारे मिळणारे व्याज एवढी रक्कम परत केली जाईल.
- जर लाभार्थी १० वर्षांनंतर पण साठ वर्ष पूर्ण होण्याआधी बाहेर पडला, तर त्याने भरलेली रक्कम आणि पेन्शन फंडाद्वारे मिळणारे व्याज किंवा बचत खात्याद्वारे मिळणारे व्याज, यापैकी जे जास्त असेल ते परत मिळेल.
- निवृत्तीवेतनाच्या प्राप्तीदरम्यान, एखाद्या पात्र लाभार्थीचा मृत्यू झाल्यास, त्याच्या जोडीदाराला पेन्शनच्या रकमेच्या पन्नास टक्के रक्कम मिळेल.
- जर एखाद्या पात्र लाभार्थ्याने नियमित योगदान दिले असेल आणि त्याचे वय ६० वर्षे पूर्ण होण्यापूर्वी कोणत्याही कारणास्तव मृत्यू झाल्यास किंवा कायमचे अपंगत्व आल्यास, त्याच्या जोडीदारास नियमित पैसे देऊन योजना सुरू ठेवता येईल किंवा अशा लाभार्थ्याने जमा केलेली रक्कम आणि पेन्शन फंडाद्वारे मिळणारे व्याज किंवा बचत खात्याद्वारे मिळणारे व्याज, यापैकी जे जास्त असेल ते घेऊन योजनेतून बाहेर पडता येईल.
- लाभार्थी आणि त्याच्या जोडीदाराच्या मृत्यूनंतर, जमा रक्कम या योजनेच्या फंडात जमा होईल कारण या योजनेचा लाभ फक्त लाभार्थी आणि त्याच्या जोडीदाराला मिळू शकतो. इतर वारसांना मिळू शकत नाही.
तेव्हा मंडळी जर आपण या प्रधानमंत्री श्रमयोगी मानधन योजनेच्या (Pradhanmantri Shramyogi Mandhan Yojana) नियमात बसत असाल तर लवकरात लवकर नाव नोंदणी करा आणि आपल्या माहितीत अशी कोणी व्यक्ती असेल जी या योजनेच्या नियमात बसत असेल तर त्यांनाही कृपया ही माहिती द्या जेणेकरून त्यांनाही याचा उपयोग होईल. धन्यवाद.